Ekonomia shqiptare pritet të përballet me një ngadalësim në vitet në vijim, ndërsa ndikimi i krizave globale dhe rritja e çmimeve mund të godasin drejtpërdrejt konsumin e familjeve.
Në raportin e fundit, Banka Botërore thekson se rritja ekonomike e Shqipërisë është mbështetur ndjeshëm nga turizmi, por kjo varësi e bën vendin më të ekspozuar ndaj goditjeve të jashtme. Institucioni nënvizon nevojën urgjente për diversifikimin e ekonomisë.
Sipas raportit, rritja ekonomike pritet të ngadalësohet, ndërsa inflacioni dhe çmimet e larta të energjisë, të ndikuara edhe nga konfliktet në Lindjen e Mesme, do të dobësojnë fuqinë blerëse të qytetarëve gjatë vitit 2026.
Ekspertët paralajmërojnë se edhe pse pagat dhe punësimi mund të rriten, këto nuk do të mjaftojnë për të kompensuar plotësisht rritjen e kostove të jetesës.
Raporti evidenton gjithashtu disa dobësi strukturore të ekonomisë shqiptare, si produktiviteti i ulët, baza e ngushtë e eksporteve dhe problemet në mjedisin e biznesit, përfshirë informalitetin dhe barrierat rregullatore.
Megjithatë, Banka Botërore vlerëson se reformat e lidhura me integrimin në Bashkimin Europian mund të sjellin përmirësime në produktivitet dhe investime, duke ndihmuar në një rritje më të qëndrueshme në afatmesëm.
