Lumir Abdixhiku do të vazhdojë të drejtojë Lidhjen Demokratike të Kosovës, pasi delegatët e Kuvendit të Jashtëzakonshëm rrëzuan nismën për shkarkimin e tij nga posti i kryetarit.
Në votimin e fshehtë morën pjesë rreth 330 delegatë. Sipas rezultatit të bërë publik nga delegatja Shqipe Pantina, 170 votuan për vazhdimin e Abdixhikut në krye të partisë, 152 votuan për shkarkimin e tij, ndërsa 5 abstenuan.
Kuvendi i jashtëzakonshëm u thirr pas kërkesës së një grupi delegatësh, të cilët e konsideruan rezultatin e LDK-së në zgjedhjet parlamentare të 7 qershorit si të pamjaftueshëm dhe kërkuan përgjegjësi politike nga kreu i partisë.
Në fjalën e tij para delegatëve, Abdixhiku e cilësoi nismën për shkarkimin si “të gabuar, të pavend dhe të pakohë”, ndërsa akuzoi kritikët e tij se kishin sabotuar partinë në periudhën më të rëndësishme politike. Ai theksoi se përgjegjësi u jep vetëm anëtarëve që kanë qenë aktivë në terren gjatë fushatës.
Pas shpalljes së rezultatit, delegatja Shqipe Pantina deklaroi se “sot fitoi demokracia”, duke theksuar se vendimi i shumicës duhet respektuar nga të gjithë.
Edhe Vjosa Osmani reagoi pas votimit, duke përgëzuar Abdixhikun me një mesazh në rrjetet sociale, ku shkroi se “jo çdo fitore është e zakonshme, disa bëhen frymëzim”.
Rikonfirmimi i Abdixhikut pritet të ndikojë edhe në zhvillimet politike në Kosovë, pasi para nisjes së krizës së brendshme ai kishte zhvilluar bisedime me Lëvizjen Vetëvendosje për formimin e institucioneve të reja. Negociatat ishin pezulluar deri në përfundimin e procesit të votëbesimit brenda LDK-së.
