Një ngjarje e rëndë është regjistruar këtë të martë në Bulqizë, ku një 53-vjeçar ka humbur jetën në rrethana ende të paqarta. Sipas informacioneve paraprake të Policisë, dyshohet se viktima është sulmuar dhe kafshuar nga një kafshë e egër, konkretisht nga një ari.
Viktima është identifikuar me inicialet U. F., ndërsa autoritetet kanë nisur hetimet për të përcaktuar shkakun e vdekjes dhe dinamikën e ngjarjes.
### Familjarët kërkuan ndihmë mjekësore, por 53-vjeçari kishte ndërruar jetë
Sipas njoftimit zyrtar, rreth orës 14:10 të datës 3 nëntor, Spitali i Bulqizës ka njoftuar Sallën Operative të Komisariatit të Policisë se familjarët e 53-vjeçarit kishin kërkuar ndihmë mjekësore.
Ata kishin ngritur dyshimet se i afërmi i tyre ishte sulmuar dhe kafshuar nga një ari.
Menjëherë pas marrjes së njoftimit, shërbimet e Policisë dhe grupi hetimor kanë shkuar në vendngjarje.
Gjatë verifikimeve, efektivët kanë konstatuar se 53-vjeçari kishte humbur jetën.
### Trupi dërgohet në Mjekësinë Ligjore, hetohen rrethanat
Trupi i pajetë i viktimës është transportuar drejt Institutit të Mjekësisë Ligjore, ku do t’u nënshtrohet ekzaminimeve të mëtejshme për përcaktimin e shkakut të vdekjes.
Policia thekson se sulmi nga ariu mbetet një dyshim paraprak dhe ende nuk është konfirmuar zyrtarisht si shkaku i vdekjes.
Grupi hetimor, nën drejtimin e Prokurorisë, po vijon punën për dokumentimin e plotë të rrethanave të ngjarjes.
Deri tani nuk janë bërë të ditura vendndodhja e saktë e incidentit dhe rrethanat në të cilat 53-vjeçari mund të jetë përballur me kafshën e egër.
Përgjigjet e ekzaminimeve mjekoligjore pritet të ndihmojnë hetuesit në sqarimin e kësaj ngjarjeje të rëndë.
