Një ditë pas transferimit të kryebashkiakut të Tiranës, Erion Veliaj, në burgun e Fierit, edhe biznesmeni Ergys Agasi pritet të zhvendoset në të njëjtin institucion penitenciar.

Sipas ABC News, forcat e Drejtorisë së Përgjithshme të Burgjeve kanë mbërritur këtë të enjte, 29 tetor, në paraburgimin e Bradasheshit, në Elbasan, ku ndodhet Agasi, për të kryer procedurat e transferimit.

Lëvizja vjen vetëm 24 orë pas transferimit të Erion Veliajt nga paraburgimi i Durrësit në burgun e Fierit, një vendim që shkaktoi reagimin e kryebashkiakut dhe të përfaqësuesve të tij ligjorë.

Veliaj e kundërshtoi publikisht transferimin, duke e cilësuar atë një “rrëmbim policor” dhe duke pretenduar se nuk i ishin bërë të ditura arsyet dhe akti administrativ që urdhëronte zhvendosjen.

Ndërkohë, transferimi i pritshëm i Ergys Agasit vjen në një kohë kur janë raportuar edhe lëvizje të tjera të mundshme në sistemin e burgjeve.

Biznesmeni Agasi u arrestua më 26 gusht 2026 në zonën e Plepave, në hyrje të Durrësit, pas disa muajsh në kërkim.

Ai ndodhet në paraburgim në kuadër të hetimeve të SPAK për dosjen e tenderëve të Agjencisë Kombëtare të Shoqërisë së Informacionit (AKSHI).

Prokuroria e Posaçme e akuzon Agasin për disa vepra penale, mes të cilave përfshirje në grup të strukturuar kriminal dhe shkelje të barazisë së pjesëmarrësve në tenderë. Biznesmeni i ka mohuar akuzat.

Pas arrestimit dhe konfirmimit të masës së sigurisë “arrest në burg” nga Gjykata e Posaçme, Agasi u vendos në paraburgimin e Bradasheshit.

Ende nuk janë bërë publike arsyet konkrete të transferimit të tij drejt Fierit dhe nuk ka një konfirmim zyrtar se procedura është përfunduar.

Me realizimin e transferimit, Erion Veliaj dhe Ergys Agasi do të ndodhen në të njëjtin institucion penitenciar, por kjo nuk nënkupton se do të vendosen në të njëjtin sektor apo se do të kenë kontakt me njëri-tjetrin.