Ikonat e viteve ’80-90 nuk dalin në pension dhe as nuk pranojnë që mosha t’u diktojë mënyrën se si duhet të vishen apo të shfaqen në publik.
Një koment seksist i drejtuar ndaj këngëtares Sabrina Salerno ka shkaktuar reagimin e fortë të mikeshës së saj historike, Jo Squillo.
Gjithçka nisi pasi 58-vjeçarja Sabrina Salerno publikoi në Instagram disa fotografi me bikini. Një përdorues e sulmoi për paraqitjen e saj, duke i shkruar: “Më vjen keq për ty, ende sillesh si vajzë e re. Jetoje moshën tënde”.
Këngëtarja iu përgjigj se veshja e rrobave të banjës nuk do të thotë të sillesh si adoleshente, por thjesht të ndihesh mirë me trupin tënd. Ajo shtoi se disa njerëz shqetësohen nga liria e të tjerëve, sepse nuk arrijnë t’ia lejojnë vetes të njëjtën gjë.
Në mbështetje të saj ndërhyri Jo Squillo. Artistja 64-vjeçare publikoi një fotografi topless, duke kundërshtuar hapur ata që kërkojnë të vendosin rregulla veshjeje në varësi të moshës.
“Po, mosha? Më e mira duhet ende të vijë”, ishte mesazhi që shoqëroi reagimin e saj.
Veprimi i Jo Squillos u prit si një demonstrim solidariteti mes dy artisteve që kanë shënuar muzikën dhe televizionin italian. Për shumë ndjekës, përgjigjja e tyre ishte edhe një mesazh kundër diskriminimit të grave për shkak të moshës dhe presionit shoqëror mbi pamjen fizike./ Leggo.it
