Eklipsi total i Diellit i 12 gushtit pritet të ofrojë një spektakël të rrallë qiellor, por fenomeni nuk tërheq vetëm vëmendjen e njerëzve. Prej vitesh shkencëtarët përpiqen të kuptojnë se si reagojnë kafshët kur drita e ditës zbehet papritur dhe për disa minuta krijohen kushte të ngjashme me natën.
Studimet tregojnë se reagimet ndryshojnë ndjeshëm nga një specie te tjetra dhe se ende nuk ka një përgjigje të vetme për mënyrën se si kafshët e perceptojnë një eklips.
Një nga studimet më interesante u krye gjatë eklipsit të vitit 2017 në Riverbanks Zoo, në Karolinën e Jugut. Studiuesit konstatuan ndryshime në sjelljen e rreth tre të katërtave të kafshëve të vëzhguara.
Për shumë prej tyre, errësimi i papritur dukej sikur sinjalizonte ardhjen e natës. Disa nisën të përgatiteshin për pushim, ndërsa të tjera shfaqën shenja shqetësimi.
Babunët, për shembull, u afruan më shumë me njëri-tjetrin, ndërsa një varan i Komodos u bë jashtëzakonisht aktiv. Edhe më e pazakontë ishte sjellja e breshkave gjigante të Galápagosit. Ato u bënë më aktive, disa ngritën kokën drejt qiellit, ndërsa dy prej tyre u çiftuan pak përpara fazës së eklipsit total.
Por një studim tjetër, i zhvilluar gjatë eklipsit të vitit 2024 në Zoo de Granby në Kanada, dha rezultate më pak dramatike. Shumica e kafshëve nuk shfaqën ndryshime të rëndësishme. Disa makakë u zhvendosën drejt vendeve më të larta dhe disa zebra treguan shenja stresi.
Kjo ka ngritur një hipotezë interesante: ndoshta një pjesë e reagimeve të kafshëve nuk shkaktohen vetëm nga errësimi i Diellit, por edhe nga njerëzit që ndodhen rreth tyre.
Studiuesi Adam Hartstone-Rose ka sugjeruar se entuziazmi, zhurma dhe grumbullimi i pazakontë i njerëzve gjatë një eklipsi mund të ndikojnë në sjelljen e kafshëve.
Pikërisht për këtë arsye, eklipsi i 12 gushtit përbën një tjetër mundësi për shkencëtarët që të vëzhgojnë se çfarë ndodh në botën e kafshëve kur, për pak minuta, dita shndërrohet në natë.
