Valët e të nxehtit ekstrem që po godasin Evropën nuk janë një fenomen i përkohshëm dhe verat e ardhshme pritet të bëhen gjithnjë e më të vështira. Paralajmërimi vjen nga ekspertët e klimës, të cilët kërkojnë ulje të mëtejshme të emetimeve që shkaktojnë ngrohjen globale.
Antonio Navarra, president i Qendrës Euro-Mesdhetare për Ndryshimet Klimatike, thotë se procesi i ngrohjes tashmë ka avancuar deri në atë pikë sa nuk mund të rikthehemi te kushtet klimatike të së kaluarës.
Megjithatë, kjo nuk do të thotë se përpjekjet për të frenuar ndryshimet klimatike janë të kota. Sipas tij, është thelbësore që vendet të vazhdojnë të reduktojnë emetimet për të kufizuar rritjen e mëtejshme të temperaturave dhe pasojat e saj.
Eksperti thekson se debati për tranzicionin klimatik duhet parë edhe nga këndvështrimi ekonomik. Fjala kyçe, sipas tij, nuk është vetëm “bindja”, por “leverdia”: kalimi drejt teknologjive dhe burimeve më të pastra të energjisë duhet të jetë gjithashtu ekonomikisht i favorshëm.
Temperaturat ekstreme, thatësirat dhe rreziku në rritje i zjarreve po bëhen ndër pasojat më të dukshme të ndryshimeve klimatike në Evropë. Paralajmërimi i ekspertëve është se, pa ulje të ndjeshme të emetimeve, verat e ardhshme mund të jenë edhe më të nxehta se ato që po përjetohen sot.
