Australia po përballet me një krizë të rëndë të biodiversitetit, me rreth katër specie që zhduken çdo dekadë. Por rikthimi i një marsupiali të vogël, numbatit, po shihet si një nga historitë e rralla të suksesit në mbrojtjen e faunës.
Numbati, një marsupial me përmasa të ngjashme me ketrin, dikur gjendej në një pjesë të madhe të Australisë. Në vitet ’80, në zonën e mbrojtur Dryandra Woodland në Australinë Perëndimore kishin mbetur më pak se 50 individë.
Pas dekadash programesh për shumimin, kontrollin e grabitqarëve dhe mbrojtjen e habitatit, popullata në Dryandra është rritur rreth dhjetëfish, ndërsa në të gjithë Australinë vlerësohet se tashmë jetojnë rreth 3 mijë numbatë. Specia është hequr së fundmi nga kategoria ndërkombëtare e specieve të rrezikuara dhe klasifikohet si “pranë kërcënimit”.
Suksesi vjen në një kohë kur situata e përgjithshme e faunës australiane mbetet alarmante. Më shumë se 80% e specieve të bimëve dhe kafshëve të Australisë nuk gjenden askund tjetër në botë, por vendi kryeson për zhdukjen e gjitarëve.
Lista zyrtare australiane numëron 67 specie të zhdukura, ndërsa studiuesit vlerësojnë se të paktën 100 specie bimësh dhe kafshësh janë humbur përgjithmonë. Numri real mund të jetë edhe më i madh.
Shkaqet janë të shumta: shkatërrimi i habitateve, urbanizimi, bujqësia dhe minierat, ndryshimet klimatike, zjarret, përmbytjet, sëmundjet dhe speciet e futura nga njeriu. Vetëm macet e egra vlerësohet se vrasin rreth tre miliardë kafshë në Australi çdo vit.
Shkencëtarët paralajmërojnë se suksesi me numbatin nuk duhet të krijojë përshtypjen se rreziku ka kaluar. Përvoja me specie të tjera tregon se, nëse ndërpriten programet e mbrojtjes, popullatat mund të bien përsëri me shpejtësi.
Rikthimi i numbatit dëshmon megjithatë se zhdukja nuk është gjithmonë e pashmangshme: ndërhyrjet afatgjata, financimi dhe mbrojtja e habitatit mund të rikthejnë një specie edhe pasi ajo ka mbërritur pranë zhdukjes.
