Nëntëdhjetë vjet pas ekzekutimit të Federico García Lorca, një prej poetëve dhe dramaturgëve më të mëdhenj të Spanjës, misteri mbi fatin e trupit të tij vazhdon të mbetet i pazgjidhur.
Lorca u arrestua në Granada më 16 gusht 1936, pak javë pas fillimit të Luftës Civile Spanjolle. Ai u konsiderua armik nga forcat nacionaliste të gjeneralit Francisco Franco për bindjet e tij republikane, miqësitë me socialistët dhe orientimin homoseksual, që në atë kohë përdorej si një tjetër arsye për ta stigmatizuar.
Poeti u pushkatua pa gjyq, ndërsa vendi ku u varros nuk është zbuluar kurrë. Gjatë dekadave janë kryer disa gërmime në zonën mes Víznar dhe Alfacar, por asnjëra nuk ka çuar në gjetjen e eshtrave të tij.
Dokumente policore të bëra publike vitet e fundit e përshkruajnë Lorcën si person me “praktika homoseksuale”, “lidhje socialiste” dhe “anëtarësi në masoneri”, akuza që u përdorën për të justifikuar eliminimin e tij.
Historianët besojnë se ekzekutimi ishte një akt politik i regjimit frankist, ndërsa për dekada diktatura mohoi përgjegjësinë për vrasjen. Vetë Franco e quajti më vonë ngjarjen një “incident natyror të luftës”.
Edhe sot ekzistojnë teori të ndryshme mbi vendndodhjen e trupit. Disa studiues besojnë se ai ndodhet ende në një varr masiv pranë Fuente Grande, ndërsa të tjerë hedhin hipotezën se familja mund t’i ketë zhvendosur eshtrat në fshehtësi shumë vite më parë.
Federico García Lorca mbetet një nga simbolet më të njohura të viktimave të terrorit frankist dhe zhdukja e trupit të tij vazhdon të konsiderohet një plagë e hapur në historinë moderne të Spanjës.
