Kryeministri Edi Rama deklaroi se projekti turistik në Zvërnec nuk do të zbatohet nëse nuk përmbush standardet e Bashkimit Europian, duke i cilësuar të pabazuara pretendimet se ai do të dëmtojë mjedisin.
Në një intervistë për televizionin britanik “Channel 4”, Rama tha se projekti është ende në fazën e vlerësimit mjedisor dhe se në hartimin e tij janë angazhuar arkitektë dhe projektues peizazhi me përvojë ndërkombëtare.
Kryeministri theksoi se synimi është rigjenerimi i zonës dhe jo shkatërrimi i saj, ndërsa shtoi se Shqipëria nuk mund të ecë përpara me një projekt që nuk respekton standardet europiane, në një kohë kur po negocion anëtarësimin në Bashkimin Europian.
