Kafshët shtëpiake po ndikojnë gjithnjë e më shumë në mënyrën se si italianët planifikojnë pushimet. Sipas një studimi të publikuar nga “La Stampa”, mbi 60% e italianëve zgjedhin vetëm destinacione “pet friendly”, ndërsa më shumë se 70% kanë hequr dorë të paktën një herë nga pushimet për shkak të vështirësive për të udhëtuar me qenin ose macen e tyre.
Tregu i turizmit me kafshë shtëpiake po njeh rritje të shpejtë. Sipas studimit të JFC, gjatë verës së vitit 2026 rreth 4 milionë familje italiane do të udhëtojnë me kafshët e tyre, duke gjeneruar mbi 73 milionë netë qëndrimi dhe një qarkullim ekonomik prej 9.56 miliardë eurosh.
Raporti tregon se 54% e udhëtarëve e konsiderojnë thelbësore gjetjen e strukturave të përshtatshme për kafshët, ndërsa 43% kërkojnë informacion për veterinerët dhe shërbimet e disponueshme në destinacion. Po ashtu, 42% duan të dinë paraprakisht rregullat dhe kufizimet që zbatohen për kafshët.
Megjithatë, sektori turistik ende nuk i plotëson plotësisht këto kërkesa. Pothuajse 9 në 10 italianë deklarojnë se hasin vështirësi gjatë organizimit të pushimeve me kafshët, kryesisht për shkak të mungesës së hoteleve të përshtatshme dhe kufizimeve në transport.
Studimi tregon gjithashtu se një pushim me kafshën shtëpiake kushton mesatarisht mbi 250 euro më shumë, por shumica e pronarëve janë të gatshëm ta përballojnë këtë shpenzim për të mos u ndarë prej tyre.
