Komisioni i Venecias ka vlerësuar pozitivisht projektligjin “Për Financimin e Partive Politike”, të dakordësuar mes Partisë Socialiste dhe Partisë Demokratike, duke e cilësuar atë një hap të rëndësishëm drejt forcimit të transparencës dhe rregullimit të financimit politik në Shqipëri.
Në opinionin e tij, organi këshillimor i Këshillit të Europës vlerëson se drafti përputhet me standardet europiane dhe synon të rrisë kontrollin mbi burimet financiare të partive politike. Megjithatë, Komisioni rekomandon një sërë përmirësimesh teknike, që lidhen me qartësimin e disa dispozitave, forcimin e mekanizmave të mbikëqyrjes dhe garantimin e zbatimit efektiv të rregullave të reja.
Projektligji pritet të shqyrtohet në Kuvend në javët e ardhshme, ndërsa rekomandimet e Komisionit të Venecias do të merren në konsideratë përpara miratimit përfundimtar të paketës ligjore.
