Besiana Kadare, vajza e shkrimtarit të ndjerë Ismail Kadare, ka shprehur mbështetjen e saj për protestën qytetare që prej ditësh po zhvillohet në Tiranë kundër qeverisë së kryeministrit Edi Rama.
Përmes një postimi në rrjetet sociale, ish-ambasadorja e Shqipërisë në OKB ka publikuar pamje nga pjesëmarrja masive në tubimin e zhvilluar të mërkurën në kryeqytet, ku mijëra qytetarë u mblodhën për të shprehur pakënaqësinë ndaj qeverisjes dhe për të kërkuar largimin e kryeministrit.
Protesta, e cila fillimisht nisi si reagim kundër projektit turistik të planifikuar në zonën e mbrojtur të Zvërnecit, është shndërruar në një lëvizje më të gjerë qytetare me kërkesa që lidhen me qeverisjen, transparencën dhe përgjegjshmërinë politike.
Mbështetja e Besiana Kadaresë vjen në një moment kur protesta po tërheq vëmendje të gjerë publike dhe po mbledh pjesëmarrës nga kategori të ndryshme të shoqërisë.
