Kryeministri britanik Keir Starmer ka refuzuar të tërhiqet nga drejtimi i qeverisë, pavarësisht presionit në rritje dhe thirrjeve për dorëheqje brenda Partisë Laburiste.
Gjatë një mbledhjeje të rëndësishme të kabinetit, Starmer deklaroi se procesi për sfidimin e liderit nuk është aktivizuar dhe se qeveria duhet të vazhdojë punën.
“48 orët e fundit kanë qenë destabilizuese për qeverinë dhe kjo ka një kosto reale ekonomike për vendin dhe familjet”, u shpreh ai sipas Downing Street.
Kreu i qeverisë britanike pranoi përgjegjësinë për rezultatet e fundit zgjedhore dhe tensionet politike, por theksoi se nuk ka ndërmend të largohet.
“Vendi pret që ne të vazhdojmë qeverisjen. Kjo është ajo që unë po bëj dhe ajo që duhet të bëjmë si kabinet”, deklaroi Starmer.
Sipas rregullave të Partisë Laburiste, për të nisur zyrtarisht një garë për lidershipin, një deputet duhet të njoftojë Komitetin Ekzekutiv Kombëtar dhe më pas të sigurojë mbështetjen e të paktën 20% të grupit parlamentar laburist, ose rreth 80 deputetë.
Edhe pse rreth 78 deputetë kanë kërkuar publikisht dorëheqjen e tij, këto deklarata nuk mjaftojnë për të nisur automatikisht procedurën për largimin e liderit.
Kriza brenda laburistëve vjen në një moment delikat për qeverinë britanike, ndërsa presioni politik dhe ekonomik ndaj kabinetit të Starmer vijon të rritet.
