Presidenti amerikan Donald Trump ka njoftuar pezullimin e operacionit ushtarak amerikan për shoqërimin e anijeve tregtare në Ngushticën e Hormuzit, duke deklaruar se ka “progres të madh” drejt një marrëveshjeje finale me Iranin.
Operacioni “Project Freedom”, i nisur vetëm pak ditë më parë, kishte si qëllim garantimin e kalimit të sigurt të anijeve në një nga korridoret më të rëndësishme të transportit të naftës në botë.
Në një deklaratë të publikuar nga Shtëpia e Bardhë, Trump tha se pezullimi është bërë pas kërkesës së Pakistanit dhe vendeve të tjera ndërmjetëse, për t’i dhënë mundësi negociatave me Teheranin.
“Ndërsa bllokada ndaj porteve iraniane do të mbetet në fuqi, Project Freedom do të pezullohet për një periudhë të shkurtër për të parë nëse marrëveshja mund të finalizohet dhe nënshkruhet”, deklaroi Trump.
Nga ana tjetër, mediat shtetërore iraniane e kanë cilësuar vendimin si një “tërheqje” të SHBA-së pas dështimeve për të rihapur plotësisht qarkullimin në Ngushticën e Hormuzit.
Pak para njoftimit të Trump, sekretari amerikan i Shtetit, Marco Rubio, deklaroi se faza sulmuese e operacionit ushtarak kundër Iranit, e quajtur “Operation Epic Fury”, kishte përfunduar dhe objektivat ishin arritur.
Sipas BBC, administrata amerikane shpreson që pezullimi i operacionit të krijojë klimë më pozitive për rikthimin e Iranit në tryezën e negociatave.
Ndërkohë, tensionet në rajon vazhdojnë të mbeten të larta, ndërsa kriza në Hormuz ka ndikuar ndjeshëm edhe në tregjet globale të energjisë dhe çmimet e naftës.
