Një studim i ri shkencor ka ngritur shqetësime serioze për mënyrën si trajtohen aragostat dhe krustacet e tjera, duke sugjeruar se ato mund të ndjejnë dhimbje, njësoj si shumë kafshë të tjera.
Hulumtimi, i publikuar në revistën Scientific Reports dhe i udhëhequr nga Universiteti i Göteborgut në Suedi, tregoi se aragostat reagojnë ndaj ilaçeve kundër dhimbjes që përdoren te njerëzit.
Gjatë eksperimenteve, aragostat u ekspozuan ndaj stimujve të dhimbshëm si goditjet elektrike dhe reaguan duke tentuar të largohen me lëvizje të shpejta të bishtit. Por, pasi u trajtuan me qetësues si aspirina dhe lidokaina, këto reagime u reduktuan ndjeshëm ose u zhdukën.
Sipas studiuesve, ky është një tregues i fortë se këto specie nuk reagojnë vetëm instinktivisht, por mund të përjetojnë dhimbje reale.
Thirrje për ndryshim praktikash
Shkencëtarët kërkojnë që praktikat aktuale, si zierja e aragostave të gjalla, të rishikohen dhe të zëvendësohen me metoda më humane.
Në disa vende si Norvegjia, Austria dhe Zelanda e Re, kjo praktikë është ndaluar për arsye etike, ndërsa vende të tjera po shqyrtojnë masa të ngjashme.
Implikime për ligjin dhe industrinë
Zbulimi prek jo vetëm industrinë ushqimore, por edhe kërkimin shkencor dhe legjislacionin për mirëqenien e kafshëve.
Ekspertët kërkojnë që krustacet të përfshihen në ligjet për mbrojtjen e kafshëve dhe që trajtimi i tyre të bëhet duke minimizuar dhimbjen./La Stampa
