Gjatë një deklarate publike, Sali Berisha u shpreh se projekti për ndërtimin e marinës në Durrës kishte përfunduar fazën e tenderimit dhe ishte gati për nisjen e punimeve, por sipas tij, u ndërpre për shkak të ndërhyrjes së kryeministrit.
Berisha pretendoi se Rama kishte kërkuar një ryshfet prej 10 milionë eurosh për të lejuar vijimin e projektit, duke iu referuar një bisede të supozuar mes tij dhe biznesmenit Ylli Ndroqi.
Sipas tij, kjo çështje është denoncuar më herët dhe, siç tha, gjendet edhe në dosje.
Në vijim, Berisha akuzoi kryeministrin se më pas i është drejtuar projektit të portit të Durrësit, duke synuar zhvendosjen e tij në Porto Romano dhe zhvillimin e një projekti të ri urban në zonën aktuale të portit.
Ai u shpreh kritik edhe për projektin e portit të ri në Porto Romano, duke pretenduar se ndryshe nga sa ishte premtuar fillimisht, ai do të financohet nga taksapaguesit shqiptarë dhe jo nga investitorë privatë.
Berisha shtoi se, sipas tij, në këtë proces janë përfshirë interesa klienteliste dhe se një tender për ndërtimin e portit të ri është anuluar pas ndërhyrjes së partnerëve ndërkombëtarë.
Akuzat e ngritura nga Berisha nuk janë komentuar deri më tani nga pala e qeverisë.
