Në Ditën e Flamurit dhe Pavarësisë, kryeministri Edi Rama ka ndarë pamje festive nga hyrjet kryesore të vendit, duke e përshkruar atmosferën si “kuqezi” dhe të mbushur me energji pozitive. Sipas tij, çdo pikë doganore e Shqipërisë, nga Morina në veri e deri në Kakavijë në jug, u kthye sot në një skenë të vërtetë gëzimi kombëtar.
“Atmosferë kuqezi në çdo hyrje të Shqipërisë. Nga Morina në Kakavijë, të gjitha pikat doganore u kthyen në skenë të gëzimit dhe energjisë së bukur shqiptare”, shkruan Rama, duke publikuar momente nga festimet e qytetarëve që hynin në vend me flamuj, muzikë dhe atmosferë kremtuese.
Pamjet tregojnë familje, të rinj e të moshuar që festojnë 28 Nëntorin ndërsa kalojnë kufirin, shumë prej tyre duke valëvitur flamurin kuqezi. Në disa pika doganore, grupet artistike dhe vallet tradicionale e kanë shndërruar ditën në një festë të hapur pranë kalimeve kufitare.
28 Nëntori është një nga ditët më domethënëse për shqiptarët, dhe këtë vit festimet u reflektuan fuqishëm edhe në pikat e hyrjes së vendit, duke përçuar një atmosferë të unitetit dhe krenarisë kombëtare.
