Tragjedia e përmbytjeve në Kerr County të Teksasit po thellohet çdo orë. Sipas të dhënave më të fundit nga autoritetet amerikane, numri i viktimave ka arritur në 91 persona, prej të cilëve të paktën 75 vetëm në Kerr County, zona më e goditur nga përmbytjet e befasishme që nisën të premten.
Kërkimet për dhjetëra persona ende të zhdukur po vazhdojnë për të katërtën ditë, ndërsa shpresat për t’i gjetur gjallë po veniten. Mes viktimave janë konfirmuar edhe 27 vajza dhe staf i kampit veror Camp Mystic, që u përfshi nga uji gjatë natës, kur lumi Guadalupe u fry me mbi 8 metra brenda një ore.
Rreziku nuk ka kaluar: Shërbimi Kombëtar i Motit paralajmëron stuhi të tjera të ngjashme në 24-48 orët në vijim.
Presidenti Donald Trump ka shpallur Kerr County si zonë fatkeqësie të madhe dhe pritet ta vizitojë zonën të enjten, ndërsa në SHBA po hapet një debat për mungesën e alarmit të hershëm për banorët e zonës. Kritikët fajësojnë shkurtime të fondeve federale në shërbimet meteorologjike dhe mungesën e sirenave të paralajmërimit në këtë zonë me histori përmbytjesh fatale.
Në terren, dhjetëra vullnetarë dhe ekipe shpëtimi po kërkojnë trupat e humbur, ndërsa janë përdorur edhe qentë kërkues për të ndihmuar operacionet. Një histori prekëse vjen nga predikuesi lokal, i cili humbi shtëpinë në përmbytje, por tregon për jetën heroike të drejtorit të kampit Mystic, Richard Eastland, i cili vdiq duke shpëtuar fëmijët.
Pamjet nga terreni tregojnë dëme masive: makina të përmbysura, ndërtesa të shkatërruara dhe shenja uji në muret e shtëpive dhe kampeve të pushimit.
Ndërkohë, banorët e Kerr County i tremben një përsëritjeje të tragjedisë, pasi shirat priten të vazhdojnë deri të paktën të hënën në mbrëmje.
