Një lajm i kobshëm ka tronditur opinionin sportiv dhe botën e futbollit: sulmuesi i Liverpool-it dhe kombëtares portugeze, Diogo Jota, ka humbur jetën në një aksident automobilistik në Spanjë.
Ngjarja e rëndë ndodhi rreth orës 00:30 me orën britanike në qytetin Zamora, ku makina tip Lamborghini që ai po drejtonte doli nga rruga për shkak të një shpërthimi të gomës gjatë një parakalimi. Automjeti shpërtheu në flakë, dhe fatkeqësisht, Jota dhe vëllai i tij, Andre Felipe, që ndodhej gjithashtu në makinë, humbën jetën në vendngjarje.
Aksidenti ndodhi më pak se dy javë pas dasmës së Jotës me partneren e tij, Rute Cardoso, që u mbajt më 22 qershor 2025. Në një postim emocional, çifti kishte ndarë një foto me mbishkrimin: “Po, përgjithmonë.”
Autoritetet spanjolle kanë konfirmuar se shkaku i aksidentit ishte humbja e kontrollit për shkak të gomës së shpërthyer, ndërsa po vazhdojnë hetimet për të sqaruar të gjitha rrethanat.
Jota, 28 vjeç, ishte një nga emrat më të dashur te tifozët e Liverpool-it dhe i njohur për përkushtimin e tij në fushë. Lajmi ka sjellë trishtim të thellë në radhët e klubit anglez, kombëtares portugeze dhe komunitetit sportiv në tërësi.
