Është rënduar ndjeshëm bilanci i aksidentit hekurudhor në Spanjë. Të paktën 64 persona kanë humbur jetën dhe rreth 80 të tjerë janë plagosur pas përplasjes së dy trenave të shpejtësisë së lartë në provincën e Toledos, rreth 130 kilometra në jug të Madridit.
Shifra e re e viktimave është konfirmuar nga autoritetet rajonale të Castilla-La Mancha, pasi ekipet e emergjencës arritën të depërtonin në vagonët më të dëmtuar të njërit prej trenave.
Sipas të dhënave të publikuara nga autoritetet, 40 prej viktimave udhëtonin në trenin Iryo, ndërsa 24 të tjerat në trenin AVE të kompanisë shtetërore Renfe.
Mes të plagosurve ka persona në gjendje shumë të rëndë, ndërsa autoritetet paralajmërojnë se bilanci i viktimave mund të rritet.
Aksidenti ndodhi mëngjesin e së mërkurës, 28 tetor, rreth orës 08:54, në afërsi të lokalitetit Urda.
Një tren AVE i Renfe, me 397 pasagjerë në bord, u përplas nga pas me një tren të kompanisë private Iryo, i cili ndodhej i ndaluar në të njëjtën linjë hekurudhore. Në trenin Iryo udhëtonin 147 persona, përfshirë një foshnjë.
Forca e përplasjes shkaktoi daljen nga shinat të disa vagonëve, një pjesë e të cilëve përfunduan poshtë një skarpate. Në vendngjarje u mobilizuan zjarrfikësit, shërbimet mjekësore, Garda Civile dhe njësitë ushtarake të emergjencave.
Dyshimet e para: Problem me sinjalistikën dhe një urdhër i gabuar
Ndërsa hetimet vijojnë, raportimet e para të mediave spanjolle ngrenë dyshime për një kombinim të defektit në sistemin e sinjalizimit dhe një gabimi njerëzor.
Sipas gazetës El País një problem në sistemin automatik të sigurisë kishte shkaktuar ndalimin e disa trenave në atë segment. Më pas, gjatë menaxhimit manual të qarkullimit, dyshohet se trenit AVE i është dhënë gabimisht leja për të vazhduar udhëtimin, megjithëse treni Iryo ndodhej ende i ndaluar përpara tij.
Kjo është vetëm hipoteza paraprake e hetimit. Autoritetet nuk kanë përcaktuar ende zyrtarisht shkakun përfundimtar të aksidentit.
Kryeministri spanjoll Pedro Sánchez ka anuluar angazhimet e tij dhe ka shprehur tronditjen për tragjedinë, duke përcjellë solidaritetin me familjet e viktimave.
Edhe familja mbretërore spanjolle ka shprehur ngushëllime, ndërsa Bashkimi Europian ka ofruar ndihmë për përballimin e pasojave.
Qarkullimi i trenave të shpejtësisë së lartë mes Madridit dhe Andaluzisë mbetet i ndërprerë. Kompania Renfe ka aktivizuar transport alternativ për disa prej udhëtarëve të prekur.
Aksidenti i dytë katastrofik brenda vitit
Tragjedia e Urdës është aksidenti më i rëndë hekurudhor në Spanjë që prej vitit 2013, kur 80 persona humbën jetën në Angrois, pranë Santiago de Compostela.
Vetëm në janar të këtij viti, një tjetër aksident i rëndë hekurudhor në Adamuz të Kordobës shkaktoi 46 viktima.
Përplasja e re ka rikthyer shqetësimet për sigurinë e rrjetit hekurudhor spanjoll, ndërsa operacionet në vendngjarje dhe hetimet
