Rumania vendosi të mërkurën datën e re të zgjedhjeve presidenciale me dy raunde, më 4 dhe 18 maj. Procesi do të zhvillohet gjashtë muaj pas zgjedhjeve të anuluara në nëntor të vitit të kaluar pas vendimit të Gjykatës Kushtetuese, i nxitur nga ndërhyrja ruse në zgjedhje duke ndikuar përmes TikTok.
Liderët politikë kanë rikonfirmuar mbështetjen për Crin Antonescu, por vendimi ende nuk është përfundimtar. Burime politike kanë zbuluar për agjencinë e lajmeve Observator në Bukuresht se përveç Crin Antonescu do të testohen në sondazhe partiake disa variante të mundshme për kandidatët për president gjatë dy javëve të ardhshme. Ioan Aurel Pop, presidenti i Akademisë Rumune, do të testohet gjithashtu në këto sondazhe, dhe PNL ka propozuar Ilie Bolojan, Emil Boc dhe ministrin e Jashtëm Emil Hurezeanu.
Socialdemokratët kanë disa variante, të cilat do të testohen në sondazhet e dy javëve të ardhshme: Sorin Grindeanu, Marcel Ciolacu, por edhe Victor Ponta, i cili bëri edhe sulmin e parë ndaj Crin Antonescu, pasi liderët e koalicionit arritën këtë konsensus të përkohshëm dhe rikonfirmuan mbështetjen për ish-liderin liberal. Victor Ponta deklaroi se Antonescu nuk ka asnjë shans të hyjë as në raundin e dytë, e lëre më të fitojë zgjedhjet presidenciale.
Vetëm në fund të janarit, koalicioni qeveritar do të miratojë një kandidat të përbashkët. Mbetet për t’u parë nëse ai që do të mbetet deri në fund do të jetë Crin Antonescu. Burime politike nga koalicioni thonë se vendimi për ish-liderin liberal nuk është përfundimtar dhe se, nëse nga këto sondazhe do të rezultojë një rezultat i dobët për të, dhe liderët e koalicionit do të arrijnë në përfundimin se ai nuk ka shanse në garën presidenciale, atëherë është shumë e mundur që të ndryshohet kandidati i përbashkët ose të arrijmë në skenarin ku të dy partitë të kenë kandidatë të veçantë.
