Ministri për të Drejtat e Njeriut dhe të Pakicave, Fatmir Gjeka, ka deklaruar se çdo vendim për rishqyrtimin e këtij titulli duhet të merret vetëm pasi të përfundojë përfundimisht procesi gjyqësor ndaj Thaçit në Hagë.
Në një intervistë për televizionin publik malazez RTCG, Gjeka theksoi se vendimi i Gjykatës Speciale nuk është ende i formës së prerë dhe se duhet pritur përfundimi i procedurës së apelimit.
“Duhet të presim vendimin përfundimtar të Gjykatës”
I pyetur për mundësinë e heqjes së titullit të nderit, ministri shqiptar tha se qëndrimi i tij mbetet i pandryshuar.
“Unë i jam përgjigjur edhe më parë kësaj pyetjeje. Po presim përfundimin e procesit gjyqësor. E dimë se bëhet fjalë për një vendim të shkallës së parë, që ende nuk është përfundimtar”, deklaroi Gjeka.
Ai shtoi se pas përfundimit të procesit në Hagë, të gjitha palët do të duhet të përcaktojnë qëndrimin e tyre.
“Sipas vendimit përfundimtar, do të duhet të pozicionohemi të gjithë, edhe ne, pavarësisht se jemi shqiptarë. Gjithmonë them se duhet pritur deri në fund rezultati i procesit gjyqësor, përfshirë apelimin”, u shpreh ministri.
Kush ia dha Thaçit titullin në vitin 2015?
Hashim Thaçi u shpall “Qytetar Nderi” i Ulqinit më 4 prill 2015, në ceremoninë e organizuar me rastin e Ditës së Komunës.
Titulli iu dorëzua nga vetë Fatmir Gjeka, i cili në atë periudhë ishte kryetar i Komunës së Ulqinit.
Në të njëjtën ceremoni, këtë titull e mori edhe kryeministri i Shqipërisë, Edi Rama.
Vendimi u argumentua me kontributin e tyre në marrëdhëniet e fqinjësisë së mirë, bashkëpunimin rajonal dhe përmirësimin e pozitës së shqiptarëve në Mal të Zi.
Pas zhvillimeve gjyqësore në Hagë, në Mal të Zi janë ngritur kërkesa politike për heqjen e titullit të Thaçit, por deri tani nuk është njoftuar ndonjë vendim për revokimin e tij.
Gjeka ngre alarmin edhe për burgjet e Malit të Zi
Gjatë intervistës, ministri shqiptar foli edhe për gjendjen e sistemit penitenciar në Mal të Zi.
Sipas tij, numri i të burgosurve është më i lartë sesa kapaciteti i institucioneve të vuajtjes së dënimit.
Gjeka propozoi që për disa vepra të lehta penale të shqyrtohet mundësia e vuajtjes së dënimit në arrest shtëpiak, duke ulur mbipopullimin dhe shpenzimet e shtetit.
Ai theksoi se burgjet nuk duhet të kthehen në vende ku njerëzve u mohohen të drejtat themelore.
Ndërkohë, çështja e titullit të Hashim Thaçit mbetet e hapur, me ministrin Gjeka që kërkon të pritet vendimi përfundimtar i drejtësisë përpara çdo hapi tjetër.
