Partia Demokratike e Kosovës (PDK) ka kërkuar rrëzimin e vetos së presidentes Justina Shiroka-Pula për ndryshimet në Ligjin për Gjykatën Speciale. Nisma synon që ligji të miratohet në formën aktuale, ndërsa ndryshimet e tjera të diskutohen në një proces të mëvonshëm parlamentar.

Kërkesa është paraqitur këtë të enjte, 12 nëntor, në Komisionin për Legjislacion të Kuvendit të Kosovës nga deputetja e PDK-së, Blerta Deliu-Kodra.

Sipas saj, për të rrëzuar veton presidenciale dhe për të miratuar ligjin nevojiten 61 vota në Kuvend.

Negociatat me Vetëvendosjen përfunduan pa marrëveshje

Deliu-Kodra zbuloi se PDK-ja ka zhvilluar bisedime me Lëvizjen Vetëvendosje për mënyrën se si duhet të procedohet me ligjin, por palët nuk kanë arritur dakordësi për ndryshimin e tij në këtë fazë.

“Ka pasur negociata me VV-në për mënyrën se si do ta trajtojmë Ligjin për Specialen. Jemi dakorduar që ta kalojmë ligjin. Nuk kemi arritur dakordësi që të bëhen ndryshime në ligj”, deklaroi deputetja.

Sipas saj, mosmarrëveshja lidhet edhe me interpretimin e Rregullores së Kuvendit.

PDK-ja ka argumentuar se ligji mund të amendohet në këtë fazë të procedurës, ndërsa shumica parlamentare ka mbajtur qëndrimin se një mundësi e tillë nuk lejohet.

Për këtë arsye, PDK-ja propozon që ligji të rikthehet për votim në Kuvend pa ndryshime të tjera.

“Prandaj, sot jemi në situatën që duhet ta procedojmë ligjin për miratim në Kuvend, në formën siç është. Pastaj do të nisim një proces të ri të amendamentimit të ligjit, bashkë me deputetët”, u shpreh Deliu-Kodra.

Edhe AAK mbështet rrëzimin e vetos

Kërkesa e PDK-së ka marrë mbështetjen edhe të Aleancës për Ardhmërinë e Kosovës.

Deputeti Besnik Tahiri deklaroi se AAK-ja mbështet rrëzimin e dekretit presidencial, por kërkon që procedura për ndryshime të tjera ligjore të nisë sa më shpejt.

“E rrëzojmë dekretin dhe kërkojmë nga ju që sa më shpejt të nisni procedurën e amendamentimit”, tha Tahiri.

Pse presidentja e ktheu ligjin në Kuvend?

Ndryshimet në Ligjin për Dhomat e Specializuara dhe Zyrën e Prokurorit të Specializuar ishin votuar fillimisht më 6 tetor.

Më 22 tetor, presidentja Justina Shiroka-Pula e ktheu ligjin për rishqyrtim në Kuvend, pas një kërkese të PDK-së, subjektit politik që kishte iniciuar ndryshimet.

Sipas raportimit të KOHA.net, ndryshimet ligjore ishin miratuar rreth dy javë pasi Gjykata Speciale kishte dënuar me gjithsej 81 vjet burg katër ish-udhëheqësit e UÇK-së: Hashim Thaçin, Kadri Veselin, Jakup Krasniqin dhe Rexhep Selimin.

Megjithatë, kërkesa për rishqyrtimin e ligjit nuk kishte marrë mbështetjen e të gjithë deputetëve të PDK-së.

Tashmë, çështja pritet të kalojë sërish në Kuvend, ku do të përcaktohet nëse ekzistojnë 61 votat e nevojshme për rrëzimin e vetos presidenciale.