Një markë britanike ushqimi për qen ka tërhequr nga tregu të gjitha vaktet e saj të freskëta, pas raportimeve për probleme serioze me sytë te kafshët që i kishin konsumuar.
Bëhet fjalë për kompaninë Years, e cila po heton një lidhje të mundshme mes ushqimit dhe një gjendjeje të quajtur “sy i thatë bilateral i papritur”, ose keratokonjuktivit sicca. Kjo gjendje ndodh kur qeni nuk prodhon mjaftueshëm lot, duke shkaktuar dhimbje, inflamacion dhe në raste të patrajtuara edhe humbje të shikimit.
Kompania bëri të ditur se deri të martën në mbrëmje kishte marrë 192 raportime nga klientë për probleme të mundshme me sytë e qenve, por theksoi se rastet ende nuk janë verifikuar përfundimisht.
Hetimi aktual po përqendrohet te një ndotje e mundshme në një pjesë të furnizimit me hikërror, përbërës që ishte shtuar në recetat e ushqimit disa muaj më parë. Years thekson se nuk është vërtetuar që vetë hikërrori është shkaktari dhe se analizat laboratorike vijojnë.
Disa pronarë tregojnë se qentë e tyre kanë pasur për muaj me radhë skuqje, sekrecione, dhimbje dhe pamundësi për të hapur sytë. Disa prej kafshëve janë trajtuar fillimisht për alergji ose konjuktivit, ndërsa më pas janë diagnostikuar me tharje të rëndë të syve.
Në një prej rasteve, një qen i racës greyhound ka pasur prodhim zero të lotëve dhe ka nevojë për trajtime me pika, pomada dhe vajra disa herë në ditë. Pronari thotë se shpenzimet për trajtimin kanë arritur në mijëra paund.
Years deklaron se tërheqja e produkteve është bërë në mënyrë vullnetare dhe parandaluese, ndërsa paralajmëron se shkaku përfundimtar nuk është përcaktuar ende.
