Bota po ndjek me vëmendje zhvillimet mes Shteteve të Bashkuara dhe Iranit, teksa presidenti amerikan Donald Trump njoftoi se do të mblidhet në “Situation Room” për të marrë një vendim përfundimtar mbi marrëveshjen që mund t’i japë fund tensioneve dhe konfliktit mes dy vendeve.
Sipas raportimeve, marrëveshja e diskutuar parashikon rihapjen e Ngushticës së Hormuzit dhe adresimin e programit bërthamor iranian. Trump deklaroi se Irani duhet të pranojë se nuk do të zotërojë armë bërthamore dhe se uraniumi i pasuruar do të nxirret dhe shkatërrohet në bashkëpunim me Agjencinë Ndërkombëtare të Energjisë Atomike (IAEA).
Megjithatë, nga Teherani kanë ardhur sinjale të kundërta. Zëdhënësi i Ministrisë së Jashtme iraniane, Esmaeil Baqaei, deklaroi se ende nuk është arritur asnjë marrëveshje përfundimtare me Uashingtonin dhe se shkëmbimi i mesazheve mes palëve vazhdon. Edhe mediat iraniane kanë raportuar se nuk ekziston ende një akord final dhe kanë shprehur skepticizëm ndaj deklaratave të presidentit amerikan.
Në të njëjtën kohë, autoritetet iraniane kanë këmbëngulur se kontrolli mbi Ngushticën e Hormuzit mbetet në duart e Teheranit. Zyrtarë iranianë kanë deklaruar se çdo marrëveshje do të duhet të respektojë interesat strategjike të Republikës Islamike dhe se çështja e fondeve iraniane të bllokuara mbetet një kusht kyç për avancimin e negociatave.
Ndërsa bisedimet vijojnë, vëmendja ndërkombëtare është përqendruar tek vendimi që pritet të marrë Trump, i cili mund të përcaktojë nëse rajoni do të shkojë drejt një faze de-përshkallëzimi apo do të mbeten të hapura tensionet mes dy vendeve.
