Të paktën pesë persona kanë humbur jetën dhe pesë të tjerë janë plagosur pasi një avion mallrash i Amazon doli nga pista gjatë uljes në Aeroportin Ndërkombëtar të Miamit dhe goditi disa automjete.
Aksidenti ndodhi pasditen e së dielës, 6 shtator, rreth orës 14:00 me orën lokale. Avioni Boeing 767-300, Prime Air Flight 7598, po mbërrinte nga San Juan i Porto Rikos kur tejkaloi pistën dhe përfundoi jashtë saj.
Avioni operohej nga kompania 21 Air për Amazon. Pas daljes nga pista, ai goditi disa automjete dhe u përfshi nga flakët.
Mbi 60 njësi të Miami-Dade Fire Rescue u mobilizuan për shuarjen e zjarrit dhe operacionin e shpëtimit.
Aksidenti shkaktoi probleme edhe në trafikun ajror. Aeroporti vendosi përkohësisht ndalimin e fluturimeve, ndërsa avionë që po udhëtonin drejt Miamit u devijuan drejt aeroporteve të tjera.
Shkaqet e aksidentit nuk janë përcaktuar ende. Autoritetet amerikane kanë nisur hetimet për të zbardhur rrethanat e ngjarjes.
