Një person ka mbetur i vrarë pas një shkëmbimi zjarri me agjentët e Shërbimit Sekret pranë kompleksit të Shtëpisë së Bardhë në Uashington.
Sipas mediave amerikane, autori i dyshuar, i identifikuar si 21-vjeçari Nasire Best, hapi zjarr pranë kryqëzimit të 17th Street dhe Pennsylvania Avenue, shumë pranë ndërtesës Eisenhower Executive Office Building.
Shërbimi Sekret bëri të ditur se i riu u përfshi në një përplasje të armatosur me efektivët dhe mbeti i vrarë në vendngjarje. Raportohet gjithashtu se një kalimtar i rastësishëm është plagosur nga të shtënat.
Sipas dokumenteve gjyqësore të publikuara nga mediat amerikane, i dyshuari kishte tentuar më herët të hynte në kompleksin e Shtëpisë së Bardhë.
Ngjarja shkaktoi alarm të lartë sigurie në zonë, ndërsa gazetarët dhe stafet pranë Shtëpisë së Bardhë u urdhëruan të futeshin menjëherë në ambiente të sigurta.
Autoritetet amerikane kanë nisur hetimet për të zbardhur motivet e sulmit dhe për të verifikuar nëse 21-vjeçari kishte lidhje me ndonjë organizatë apo veproi i vetëm.
