Rusia ka intensifikuar përpjekjet e fshehta për të minuar rizgjedhjen e kryeministrit armen Nikol Pashinyan në zgjedhjet parlamentare të 7 qershorit, raportoi Reuters duke cituar zyrtarë të inteligjencës dhe qeverive perëndimore.
Sipas raportimit, Moska ka organizuar fushata dezinformimi në favor të kandidatëve pro-rusë dhe ka shqyrtuar një plan për të transportuar dhjetëra mijëra armenë që jetojnë në Rusi me qëllim ndikimin në votime.
Pashinyan, i cili kryeson sondazhet, ka afruar Armeninë me Bashkimin Europian, NATO-n dhe Shtetet e Bashkuara, duke u distancuar gradualisht nga ndikimi tradicional rus. Këtë javë, Sekretari amerikan i Shtetit, Marco Rubio, vizitoi Jerevanin, ku u nënshkruan marrëveshje ekonomike dhe infrastrukturore që synojnë të rrisin praninë perëndimore në rajon.
Sipas burimeve të cituara nga Reuters, Kremlini mbështet biznesmenin armeno-rus Samvel Karapetyan, i cili aktualisht përballet me akuza për thirrje për përmbysjen e qeverisë. Ai i mohon akuzat, ndërsa avokati i tij deklaroi se klienti nuk ka dijeni për ndonjë mbështetje nga Rusia.
Raporti pretendon gjithashtu se autoritetet ruse kanë diskutuar transportimin e rreth 100 mijë votuesve nga Rusia drejt Armenisë. Sipas burimeve të inteligjencës, kostoja e operacionit do të arrinte rreth 50 milionë dollarë.
Moska i ka hedhur poshtë akuzat. Ministria e Jashtme ruse deklaroi se raportimi përmban pretendime të pavërteta dhe se promovon retorikë anti-ruse.
Ndërkohë, qeveria armene nuk komentoi drejtpërdrejt pretendimet, por theksoi se po ndërmerren masa për të luftuar dezinformimin dhe për të garantuar zgjedhje të lira dhe transparente.
Sipas Reuters, zyrtarë perëndimorë shprehin shqetësime serioze edhe për sigurinë personale të Pashinyanit. Raporti pretendon se elementë të qeverisë amerikane, përfshirë CIA-n, kanë ndihmuar në mënyrë të fshehtë për mbrojtjen e kryeministrit armen në vitet e fundit.
Zgjedhjet e 7 qershorit konsiderohen vendimtare për orientimin gjeopolitik të Armenisë, mes ndikimit tradicional rus dhe afrimit të saj me Perëndimin.
