Përplasja ushtarake mes Shteteve të Bashkuara dhe Iranit po hyn në një fazë edhe më të rrezikshme. Komanda Qendrore e SHBA-së (CENTCOM) njoftoi se ka nisur një valë të re sulmesh ajrore ndaj objekteve ushtarake iraniane përgjatë bregdetit, me synim dobësimin e kapaciteteve që përdoren për sulmet ndaj anijeve tregtare në Ngushticën e Hormuzit.
Sipas autoriteteve iraniane, më shumë se 30 civilë janë vrarë dhe mbi 260 të tjerë janë plagosur në jug të vendit gjatë ditëve të fundit si pasojë e sulmeve amerikane.
Në reagim, Garda Revolucionare Islamike (IRGC) paralajmëroi se eksporti i naftës dhe gazit nga Lindja e Mesme mund të bllokohet plotësisht.
“Nafta dhe gazi do të eksportohen ose për të gjithë, ose për askënd”, deklaroi IRGC, duke kërcënuar zgjerimin e bllokadës pas rivendosjes nga SHBA të bllokadës detare ndaj porteve iraniane.
Ndërkohë, Bahreini njoftoi se ka neutralizuar sulme me raketa dhe dronë të lëshuara nga Irani, ndërsa Këshilli i Bashkëpunimit të Gjirit (GCC) dënoi sulmet ndaj Bahreinit, Kuvajtit dhe Jordanisë, duke i cilësuar një përshkallëzim të rrezikshëm që kërcënon sigurinë rajonale.
Nga ana tjetër, ish-zëvendëskryeministri dhe ish-ministri i Jashtëm i Jordanisë, Marwan Muasher, deklaroi se konflikti nuk ka arritur asnjë nga objektivat e tij dhe se zgjidhja mund të vijë vetëm përmes diplomacisë.
Përplasjet mes SHBA-së dhe Iranit po shtojnë frikën për një destabilizim të mëtejshëm të Lindjes së Mesme dhe për pasoja të rënda në tregjet ndërkombëtare të energjisë, ndërsa Ngushtica e Hormuzit mbetet pika më kritike për transportin global të naftës./Al Jazeera
