Pronarët e qenve dhe maceve në Shqipëri mund t’i pajisin tashmë kafshët e tyre me Pasaportën Kombëtare të Unifikuar.
Urdhri i Mjekut Veterinar njofton se dokumenti mund të merret pranë klinikave veterinare të autorizuara që ofrojnë shërbimin e pasaportizimit unik kombëtar.
Pasaporta lëshohet në zbatim të Urdhrit të Ministrit nr. 634, datë 2 nëntor 2023, për miratimin e rregullores mbi lëvizjen jotregtare të kafshëve të shoqërimit.
Dokumenti shërben për identifikimin dhe shoqërimin e kafshës sipas kërkesave ligjore.
Urdhri i Mjekut Veterinar ka publikuar edhe listën e klinikave që aktualisht ofrojnë këtë shërbim. Lista pritet të përditësohet periodikisht, duke përfshirë klinika të tjera që plotësojnë kriteret e përcaktuara nga legjislacioni.
Pronarëve të kafshëve u bëhet thirrje të interesohen pranë klinikave të autorizuara për procedurën dhe dokumentacionin e nevojshëm për pajisjen me pasaportën kombëtare.
