Shqipëria ka shënuar një moment historik në aviacionin civil me mbërritjen në Aeroportin Ndërkombëtar të Tiranës të fluturimit të parë transatlantik direkt nga Toronto i Kanadasë. Linja e re Tiranë-Toronto dhe anasjelltas e fut për herë të parë vendin në hartën e fluturimeve ndërkontinentale.
Pasagjerët e fluturimit të parë u pritën me një ceremoni të posaçme në aeroport, ku morën pjesë përfaqësues të qeverisë, drejtues të aeroportit dhe të kompanisë ajrore. Kryeministri Edi Rama e cilësoi nisjen e linjës si një zhvillim të shumëpritur dhe një tregues të transformimit të sektorit të aviacionit në Shqipëri.
Rama deklaroi se objektivi i ardhshëm strategjik është hapja e linjës direkte me Shtetet e Bashkuara të Amerikës, duke theksuar se Shqipëria është më pranë se kurrë realizimit të këtij projekti. Ai bëri të ditur se fluturimi i parë nga Toronto mbërriti plot me pasagjerë dhe parashikoi sukses për linjën e re.
Kryeministri solli në vëmendje edhe rritjen e jashtëzakonshme të trafikut ajror në vend. Sipas tij, nga 2.2 milionë pasagjerë dhe 22 mijë fluturime në vitin 2016, Aeroporti i Tiranës ka arritur në 13.7 milionë pasagjerë dhe 82 mijë fluturime në vitin 2025, duke u renditur ndër aeroportet me rritjen më të shpejtë në Europë.
Ai njoftoi gjithashtu se së shpejti do të nisë përdorimi i portave dixhitale për qytetarët shqiptarë me pasaportë biometrike, duke lehtësuar procedurat e hyrjes dhe duke rritur sigurinë aeroportuale.
Në fjalën e tij, Rama u ndal edhe te projektet e tjera të aviacionit civil, duke garantuar se aeroporti i Vlorës do të hapet pavarësisht vonesave të shkaktuara nga mosmarrëveshjet brenda kompanisë koncesionare. Ai konfirmoi gjithashtu se qeveria po përgatitet për hapjen e garës për aeroportin turistik të Gjirokastrës, ndërsa mbetet në fokus edhe zhvillimi i aeroportit të Kukësit.
