Argjentina ka siguruar një biletë dramatike për në çerekfinalet e Kupës së Botës 2026, pasi përmbysi Egjiptin me rezultatin 3-2 në një nga ndeshjet më spektakolare të turneut.
Kampionët në fuqi ishin shumë pranë eliminimit, pasi Egjipti kryesonte 2-0 deri në minutën e 79-të falë golave të Yasser Ibrahim dhe Mostafa Zico.
Megjithatë, në vetëm pak minuta gjithçka ndryshoi. Mbrojtësi Cristian Romero ngushtoi diferencën në minutën e 79-të pas një asisti të Lionel Messit, ndërsa katër minuta më vonë vetë kapiteni argjentinas barazoi shifrat në 2-2, duke shlyer edhe penalltinë e humbur më herët gjatë takimit.
Kur ndeshja po shkonte drejt kohës shtesë, Enzo Fernandez realizoi golin e fitores në minutën e dytë shtesë, pas një krosimi të Lautaro Martinez, duke vulosur një përmbysje të pabesueshme.
Lionel Messi u shpall lojtari i ndeshjes, duke qenë protagonist absolut me një gol dhe një asist. Sipas statistikave, ai ka kontribuar me gola ose asist në nëntë ndeshjet e fundit të Kupës së Botës, me 13 gola dhe 3 asistime në këtë seri.
Me këtë fitore, Argjentina avancon në çerekfinale, ku do të përballet me fituesen e sfidës mes Zvicrës dhe Kolumbisë.
Për Egjiptin, eliminimi ishte tepër i dhimbshëm, pasi skuadra afrikane ishte vetëm pak minuta larg një prej surprizave më të mëdha në historinë e Botërorit.
