Kryeministri i Kosovës, Albin Kurti, ka dalë sërish para mediave mbrëmjen e së martës, duke propozuar një emër të ri për postin e Presidentes së Republikës: Justina Shiroka-Pula.
Kurti i ka bërë thirrje Partisë Demokratike të Kosovës që deputetët e saj të marrin pjesë në seancë dhe të votojnë kandidaten e re, ndërsa ka përsëritur ofertën që Vetëvendosje të votojë paraprakisht ndryshimet në Ligjin për Dhomat e Specializuara.
Propozimi vjen vetëm pak orë përpara përfundimit të afatit për zgjedhjen e presidentit, në një ditë me negociata dhe oferta të njëpasnjëshme mes Vetëvendosjes dhe PDK-së.
Më herët gjatë ditës, Kurti kishte përmendur edhe emra të tjerë për postin e presidentit, ndërsa propozimi më i fundit është Justina Shiroka-Pula.
Ajo është kryetare e Akademisë së Shkencave dhe të Arteve të Kosovës dhe ka mbajtur më herët edhe poste qeveritare dhe ka qenë ish deputete e PDK.
Oferta e Kurtit ruan formulën e paraqitur më herët gjatë mbrëmjes: ndryshimet në Ligjin për Specialen të votohen fillimisht dhe më pas të zhvillohet votimi për presidentin.
PDK-ja ka këmbëngulur gjatë gjithë ditës që ligji për Dhomat e Specializuara të miratohet përfundimisht përpara se të arrihet një marrëveshje politike për kreun e shtetit.
Kreu i PDK-së, Bedri Hamza, ka deklaruar se presidenti nuk mund të zgjidhet pa një marrëveshje mes forcave politike.
Koha ndërkohë po ngushtohet, pasi 6 tetori është afati i fundit për zgjedhjen e presidentit të Kosovës dhe dështimi për të arritur një marrëveshje mund ta çojë vendin drejt zgjedhjeve të reja.
