Ministri për Europën dhe Punët e Jashtme, Ferit Hoxha, zhvilloi një takim me ministrin e Jashtëm gjerman, Johann Wadephul, në kuadër të takimit ministror të Procesit të Berlinit në Pržno të Malit të Zi.

Në qendër të bisedimeve ishte rrugëtimi i Shqipërisë drejt Bashkimit Europian dhe vijimi i reformave të lidhura me procesin e anëtarësimit.

Hoxha vlerësoi mbështetjen e Gjermanisë për zgjerimin e BE-së dhe, në veçanti, për anëtarësimin e Shqipërisë.

“Shpreha vlerësimin tonë të thellë për mbështetjen e qartë, konsistente dhe të vazhdueshme të Gjermanisë për procesin e zgjerimit të BE-së dhe për anëtarësimin e Shqipërisë në Bashkimin Europian”, deklaroi Hoxha pas takimit.

Sipas ministrit të Jashtëm, angazhimi i Berlinit për një proces zgjerimi të besueshëm dhe të bazuar në merita është i rëndësishëm për ruajtjen e ritmit të integrimit dhe avancimin e perspektivës europiane të Ballkanit Perëndimor.

Hoxha theksoi se agjenda e reformave të Shqipërisë dhe përmbushja e prioriteteve në negociatat e anëtarësimit mbeten përcaktuese për të ardhmen europiane të vendit.

“Ne mbetemi plotësisht të përkushtuar për të përmbushur zotimet tona dhe për të avancuar mbi bazën e meritave, ndërsa punojmë ngushtë me Gjermaninë dhe partnerët tanë europianë drejt një Europe më të fortë, më të bashkuar, më të sigurt dhe më të qëndrueshme”, deklaroi Hoxha.