Kreu i Partisë Demokratike, Sali Berisha, ka sulmuar platformën “Pasqyra Albania”, të prezantuar nga kryeministri Edi Rama pas mbledhjes me drejtuesit politikë të qarqeve dhe krerët e komisioneve parlamentare të Partisë Socialiste.
Sipas Berishës, platforma e re nuk do të përmirësojë komunikimin e institucioneve me qytetarët, por do të shërbejë si një “mur” që fsheh problemet e administratës.
“Pasqyra është që tani e verbër. Është një mur për të mashtruar qytetarët”, deklaroi Berisha, duke e krahasuar nismën me platformën “Diella”, të cilën e cilësoi të dështuar.
Kreu demokrat pretendoi se “Diella” nuk ka parandaluar asnjë rast korrupsioni dhe akuzoi qeverinë se po i përdor platformat digjitale për propagandë dhe për shpërdorimin e fondeve publike. Ai deklaroi se për “Diellën” janë shpenzuar 6 milionë euro dhe se edhe projekti i ri mund të kushtojë disa milionë të tjera. Për këto shifra, Berisha nuk paraqiti dokumente ose prova gjatë deklaratës së publikuar.
“Zinxhiri i mashtrimeve të tij ka marrë fund. Pasqyra është një perde që kërkon t’u vihet para syve qytetarëve, sikur po komunikojnë me institucionet, kur aty nuk ka asgjë të vërtetë”, tha ai.
“Pasqyra Albania” është prezantuar nga Rama si një ekosistem i ri komunikimi ndërmjet qytetarëve dhe institucioneve. Sipas të dhënave të bëra publike, platforma parashikohet të mbledhë ankesat dhe sinjalizimet e qytetarëve përmes seksionit “Flamingo Mirror”, ndërsa moduli “Radar” do të ndjekë trajtimin e tyre nga administrata.
