Kreu i Grupit Parlamentar të Partisë Socialiste, Taulant Balla, ka ironizuar protestën e zhvilluar në Tiranë, duke deklaruar se ajo nuk është më “protesta e flamingove”, por “protesta e Saliut”.
Përmes një postimi në rrjetet sociale, Balla publikoi një video me flamingo dhe komentoi se protestuesit janë zëvendësuar nga, sipas tij, “prurjet e kënetës opozitare”, duke përmendur edhe pjesëmarrës nga Kosova dhe Maqedonia e Veriut.
“KJO TANIMË ËSHTË PROTESTA E SALIUT. Protesta nuk është më e flamingove! Flamingot e bukur i kanë zëvendësuar prurjet e kënetës opozitare, shtuar këtu për fundjavat e plazhit edhe sorra inkubatorësh të urrejtjes nga Prishtina dhe Tetova, të cilët maskohen si shqiponja diaspore”, shkruan Balla në reagimin e tij.
Deklarata e Ballës vjen pas protestave të ditëve të fundit në Tiranë, të cilat kanë shkaktuar përplasje të forta politike mes mazhorancës dhe opozitës.
