Partia Socialiste paralajmëron se do të vijojë me Reformën Zgjedhore edhe pa pjesëmarrjen e opozitës. Pas bojkotit të mbledhjes së Komisionit për Reformën Zgjedhore nga përfaqësuesit e Partisë Demokratike, kreu i grupit parlamentar socialist, Taulant Balla, deklaroi se mazhoranca ka votat e nevojshme për t’i kaluar ndryshimet në Kuvend.
Balla vendosi si afat 30 nëntorin, datë kur duhet të përfundojë puna e komisionit, duke paralajmëruar se nëse demokratët nuk rikthehen në tryezë, socialistët do të depozitojnë propozimet e tyre në Parlament.
“Nëse nuk kthehen deri më 30 nëntor, PS do të çojë propozimet e veta në Kuvend. I kemi 3/5-at”, ishte mesazhi i Ballës.
“Të drejtën e vetos ua kemi dhënë ne”
Kreu i grupit parlamentar të PS-së kritikoi vendimin e demokratëve për të braktisur komisionin, duke e cilësuar bojkotin një pengesë për vijimin e reformës.
“Kush e bojkotoi komisionin? E bojkotuan ata! Komisioni nuk ka pse të ndërpritet. Nuk ke pse e lë vendin duke abuzuar me një të drejtë, si ajo e vetos. PD t’i sjellë të gjitha propozimet në komision. Të diskutohen, por bojkoti i komisionit me një të drejtë që ta kemi dhënë ne, është i papranueshëm”, deklaroi Balla.
Sipas tij, mazhoranca i ka garantuar opozitës të drejtën e vetos në komision, pavarësisht se socialistët disponojnë shumicën prej tri të pestash të votave në Kuvend.
Balla akuzoi gjithashtu demokratët se po përpiqen të pengojnë procesin përmes bojkotit, duke përdorur shprehjen se opozita po hedh “shashka” në një situatë që ai e cilësoi si “vdekje politike”.
Çfarë ndryshimesh kërkon Partia Socialiste?
Përtej përplasjes politike, Balla foli edhe për disa prej propozimeve që socialistët synojnë të përfshijnë në reformë.
Një prej tyre lidhet me përfaqësimin në këshillat bashkiakë të zonave që dikur ishin bashki më vete, por që u shkrinë gjatë reformës territoriale.
Sipas Ballës, mund të krijohet një mekanizëm që u garanton këtyre zonave përfaqësim në këshillat bashkiakë, mbi bazën e një përpjesëtimi të caktuar.
Një tjetër propozim është rikthimi i numërimit të votave në qendrat e votimit. Balla argumentoi se kjo mënyrë do të përshpejtonte nxjerrjen e rezultateve zgjedhore.
Ai përmendi gjithashtu mundësinë e rikthimit te një formulë e diskutuar në vitin 2020 për depolitizimin e komisioneve zgjedhore.
Balla kundër listave të hapura për këshillat bashkiakë
Kreu i grupit parlamentar socialist shprehu një qëndrim të prerë edhe për mënyrën e zgjedhjes së anëtarëve të këshillave bashkiakë.
“Flas si deputet dhe politikan me shumë vite mbi supe. Sa i përket hapjes së listave për anëtarët e këshillave bashkiakë, unë jam kundër”, deklaroi ai.
Përplasja në Komisionin për Reformën Zgjedhore vjen pas largimit të përfaqësuesve demokratë nga mbledhja e 9 nëntorit.
Opozita kundërshton mënyrën se si po zhvillohet procesi, ndërsa mazhoranca këmbëngul se puna duhet të vazhdojë.
Me afatin e 30 nëntorit të vendosur nga socialistët, mbetet për t’u parë nëse palët do të rikthehen në tryezën e përbashkët apo nëse propozimet për ndryshimet zgjedhore do të kalojnë drejtpërdrejt për shqyrtim në Kuvend.
