Policia e Tiranës ka arrestuar autorin e dyshuar të grabitjes së një banke në zonën e Komunës së Parisit, ngjarje e ndodhur disa ditë më parë. Në pranga ka rënë Robert Duka, 50 vjeç, nga Vlora, i cili dyshohet se është përfshirë edhe në një tjetër grabitje bankare në të njëjtën zonë.
Sipas burimeve të A2 CNN, arrestimi i 50-vjeçarit është kryer pranë rrugës së Kosovarëve në kryeqytet.
Kërcënoi stafin me armë, më pas u largua me monopatinë
Nga të dhënat paraprake të hetimit rezulton se Robert Duka dyshohet se ka hyrë në ambientet e një banke të nivelit të dytë në Komunën e Parisit, ku ka kërcënuar punonjësit me armë.
Pas grabitjes, ai dyshohet se është larguar nga vendngjarja duke përdorur një monopatinë, në përpjekje për t’iu shmangur identifikimit dhe kapjes nga policia.
Hetimet e kryera pas ngjarjes kanë çuar në identifikimin dhe arrestimin e tij.
Dyshohet edhe për një tjetër grabitje banke
Por grabitja e fundit mund të mos jetë e vetmja ngjarje në të cilën dyshohet se është përfshirë 50-vjeçari.
Sipas burimeve të A2 CNN, Robert Duka po hetohet edhe si autor i mundshëm i një grabitjeje tjetër bankare, të ndodhur disa muaj më parë, po në zonën e Komunës së Parisit.
Hetuesit po punojnë për të dokumentuar plotësisht të dyja ngjarjet dhe për të përcaktuar përgjegjësinë e të arrestuarit.
Deri tani nuk janë bërë publike të dhëna mbi shumën e parave të grabitura apo nëse arma e përdorur gjatë ngjarjes është sekuestruar.
