Milan Radoiçiq, ish-nënkryetari i Listës Serbe i kërkuar nga INTERPOL-i për ngjarjet e Banjskës, është shfaqur publikisht në një tubim parazgjedhor të Partisë Përparimtare Serbe në Kragujevc.
Pamjet e publikuara nga televizioni serb N1 tregojnë Radoiçiqin përpara sallës “Jezero”, në shoqërinë e Danilo Vuçiçit, djalit të Aleksandar Vuçiçit.
Radoiçiq është në kërkim ndërkombëtar në lidhje me sulmin e armatosur të 24 shtatorit 2023 në Banjskë të Zveçanit. Ai mori publikisht përgjegjësinë për organizimin e grupit të armatosur të përfshirë në ngjarje, ku u vra rreshteri i Policisë së Kosovës Afrim Bunjaku.
INTERPOL-i lëshoi kërkim ndërkombëtar për Radoiçiqin dhe persona të tjerë të dyshuar në dhjetor të vitit 2023.
N1 raportoi se Danilo Vuçiç mbërriti në tubimin e SNS-së i shoqëruar nga disa automjete me drita sinjalizuese. Më pas, kamerat e televizionit filmuan edhe Radoiçiqin pranë tij, jashtë sallës ku zhvillohej aktiviteti elektoral.
Shfaqja publike e Radoiçiqit në një aktivitet politik në Serbi ka tërhequr vëmendje për shkak të kërkimit ndërkombëtar ndaj tij dhe çështjes së hapur për sulmin në Banjskë.
