Një program për rikthimin e maceve të egra në natyrë ka arritur një tjetër etapë të rëndësishme në Skoci. Që prej nisjes së projektit “Saving Wildcats” në vitin 2023, në Malësitë e Skocisë janë liruar gjithsej 50 mace të egra.
Vetëm gjatë kësaj vere janë rikthyer në natyrë edhe katër individë të tjerë, duke e çuar në 50 numrin total të maceve të liruara në zonën e Cairngorms.
Sipas të dhënave të projektit, për të tretin vit radhazi janë regjistruar edhe kotele të lindura në natyrë. Kjo tregon se disa prej femrave të liruara po shumohen me sukses dhe po përshtaten me habitatin e tyre.
Pas rikthimit në natyrë, macet monitorohen përmes pajisjeve GPS dhe kamerave kurth, të cilat u mundësojnë specialistëve të ndjekin lëvizjet dhe sjelljen e tyre.
Macja e egër skoceze mbetet megjithatë një specie kritikisht e rrezikuar. Ndër kërcënimet kryesore për të janë kryqëzimi me macet shtëpiake, aksidentet rrugore dhe presioni mbi habitatin natyror.
Projekti synon krijimin e një popullate të qëndrueshme të maceve të egra në Skoci dhe riprodhimi i tyre në natyrë konsiderohet një tregues i rëndësishëm për ecurinë e programit.
