Presidenti amerikan Donald Trump ka paralajmëruar një ofensivë të re ekonomike kundër Iranit, duke deklaruar se Shtetet e Bashkuara do të ndërmarrin atë që ai e quajti “operacioni ekonomik më dërrmues i ndërmarrë ndonjëherë kundër një vendi”.
Strategjia vjen pas muajsh konflikti dhe pasi përpjekjet për ta detyruar Teheranin të rikthehej në negociata bërthamore nuk dhanë rezultat. Trump ka ndërprerë bisedimet me Iranin dhe administrata e tij po orienton tashmë presionin drejt një lufte të zgjatur ekonomike.
Në një mesazh të ri, presidenti amerikan paralajmëroi edhe vendet e treta që ndihmojnë Iranin të shmangë sanksionet. Ai kërkoi ndalimin e kontrabandës së naftës, transfertave të parave, linjave financiare, kompanive fasadë dhe regjistrimit të anijeve që përdoren për të mbajtur gjallë ekonominë iraniane.
“E dini kush jeni”, ishte paralajmërimi i Trump për qeveritë, bankat dhe bizneset që mund të vazhdojnë të bashkëpunojnë me Teheranin.
Një nga objektivat kryesore të Uashingtonit pritet të jetë eksporti iranian i naftës dhe rrjetet financiare që e mundësojnë atë. Në këtë kuadër mund të shtohet presioni edhe ndaj institucioneve kineze të përfshira në tregtinë e naftës iraniane.
Por strategjia mbart rreziqe të mëdha. Një izolim real i ekonomisë iraniane mund të kërkojë muaj apo vite, ndërsa Teherani ka përvojë të gjatë në përballimin dhe anashkalimin e sanksioneve ndërkombëtare.
Një tjetër pikë kyçe mbetet Ngushtica e Hormuzit. Çdo përshkallëzim ushtarak apo sulm ndaj transportit detar mund të rrisë çmimet e energjisë dhe të godasë drejtpërdrejt konsumatorët amerikanë, vetëm pak muaj përpara zgjedhjeve të mesmandatit.
Pikërisht këtu qëndron dilema e strategjisë së re të Trump: nëse presioni ekonomik do të zgjasë, mbetet për t’u parë nëse administrata amerikane do ta mbajë kursin deri në fund apo nëse kostot politike dhe ekonomike do ta detyrojnë të ndryshojë sërish qasje./CNN
