Zgjedhjet paraprake të së martës në Florida, Alaska dhe Wyoming sollën fitore për disa prej kandidatëve të mbështetur nga Donald Trump, por edhe humbje që tregojnë se mbështetja e presidentit nuk garanton më automatikisht sukses brenda Partisë Republikane.
Në Florida, republikanët zgjodhën kongresmenin Byron Donalds si kandidat për guvernator, në garën për të pasuar Ron DeSantis, i cili nuk mund të rikandidojë për shkak të kufizimit të mandateve. Donalds, një aleat i ngushtë i Trump dhe i mbështetur prej tij, do të përballet në zgjedhjet e nëntorit me demokratin David Jolly.
Jolly ka një histori të pazakontë politike. Ai ka qenë më parë kongresmen republikan, u largua nga partia në vitin 2018 dhe vitin e kaluar iu bashkua zyrtarisht demokratëve.
Megjithatë, rezultati i Donalds ngriti pikëpyetje. Pavarësisht mbështetjes së Trump, strukturave republikane dhe më shumë se 100 milionë dollarëve të mbledhura gjatë fushatës, ai po shkonte drejt një rezultati nën 50% në garën me katër kandidatë.
Sinjale më shqetësuese për Trump erdhën nga gara të tjera. Në distriktin e 19-të të Floridës, kandidatja e mbështetur prej tij, Catalina Lauf, humbi përballë biznesmenit dhe rishtarit në politikë Jim Schwartzel.
Edhe në Wyoming, kandidatja e Trump për guvernatore, Megan Degenfelder, u mund nga senatori shtetëror Eric Barlow. Ndërkohë, aleatja e fortë e presidentit, Harriet Hageman, fitoi lehtësisht garën republikane për Senat.
Një tjetër rezultat i rëndësishëm erdhi nga demokratët në Florida. Përfaqësuesja shtetërore Angie Nixon, e lidhur me socialistët demokratë, fitoi papritur garën për nominimin për Senat kundër ish-nënkolonelit Alex Vindman.
Fitorja ishte veçanërisht befasuese për shkak të diferencës së madhe financiare: Vindman kishte mbledhur rreth 16 milionë dollarë, kundrejt rreth 1 milion dollari të Nixon. Ajo e kishte vendosur situatën e palestinezëve dhe kundërshtimin ndaj mbështetjes ushtarake amerikane për Izraelin në qendër të fushatës.
Në Alaska, vëmendja është përqendruar te gara për Senat. Republikani Dan Sullivan dhe ish-kongresmenia demokrate Mary Peltola konsiderohen favoritë për të kaluar në zgjedhjet e përgjithshme, ku demokratët shpresojnë ta bëjnë shtetin tradicionalisht republikan një nga fushëbetejat për kontrollin e Senatit.
Rezultatet e së martës japin sinjalet e para për betejën politike të nëntorit, kur demokratët dhe republikanët do të luftojnë për kontrollin e Kongresit.
Burimi: CNN
