Tiranë – Qeveria ka vendosur të rrisë me 701 milionë lekë financimin për Policinë e Shtetit përmes Aktit Normativ të Buxhetit 2026. Lajmi u bë i ditur nga ministri i Punëve të Brendshme, Besfort Lamallari, i cili theksoi se fondet shtesë do të përdoren për përmirësimin e kushteve të punës së efektivëve, investime në teknologji dhe modernizimin e strukturave të policisë.
Sipas ministrit, financimi i ri synon të rrisë kapacitetet operacionale të Policisë së Shtetit dhe të përshpejtojë procesin e përafrimit të institucionit me standardet më të mira evropiane.
“Përmes Aktit Normativ të Buxhetit 2026, rrisim me 701 milionë lekë financimin për Policinë e Shtetit. Më shumë mbështetje për pagat e efektivëve, më shumë investime në teknologji, më shumë motivim për strukturat elitare dhe një tjetër hap i vendosur drejt modernizimit sipas standardeve më të mira evropiane. Një polici më e fortë do të thotë një Shqipëri më e sigurt”, deklaroi Lamallari.
Sipas Ministrisë së Brendshme, fondet do të shërbejnë për disa drejtime kryesore, duke përfshirë përmirësimin e pagave të efektivëve, pajisjen me teknologji moderne, rritjen e mbështetjes për strukturat elitare dhe investime në infrastrukturën policore.
Qeveria argumenton se rritja e financimit është pjesë e strategjisë për forcimin e rendit dhe sigurisë publike, në një periudhë kur sfidat ndaj krimit dhe nevoja për modernizim të institucioneve të sigurisë mbeten prioritare.
