Liverpool ka zyrtarizuar transferimin e mbrojtësit francez Jeremy Jacquet nga Rennes, në një marrëveshje që mund të arrijë vlerën e 60 milionë paundëve (rreth 80 milionë dollarë).
20-vjeçari ka firmosur një kontratë pesëvjeçare me klubin anglez, me opsion zgjatjeje edhe për një sezon tjetër. Liverpool do të paguajë fillimisht 55 milionë paund, ndërsa 5 milionë të tjera do të jepen në formë bonusesh të lidhura me performancën.
Jacquet u shpreh i emocionuar për transferimin në “Anfield”, duke e cilësuar atë si realizimin e një ëndrre.
“Është një ëndërr e madhe për mua. Liverpool është një klub i madh dhe mezi pres të nis këtë aventurë”, deklaroi mbrojtësi francez.
Talenti i kombëtares franceze U-21 zgjodhi Liverpoolin pavarësisht interesimit të Bayern Munich dhe Chelsea. Ai pranoi se projekti sportiv dhe mundësia për të mësuar pranë kapitenit Virgil van Dijk ishin vendimtarë në zgjedhjen e tij.
Transferimi ishte arritur në parim që në janar, por u shty pasi Jacquet pësoi një dëmtim serioz në shpatull. Futbollisti ka përfunduar rehabilitimin dhe pritet të jetë gati për fazën përgatitore të sezonit të ri.
Me këtë transferim, Jacquet bëhet një nga mbrojtësit francezë më të shtrenjtë në histori, edhe pse deri tani ka zhvilluar vetëm 37 ndeshje në elitën e futbollit francez.
