Autoritetet greke kanë nisur një ofensivë të re kundër lojërave të paligjshme të fatit, duke ngritur padi ndaj 18 influencerëve të akuzuar se kanë promovuar kompani të paautorizuara të basteve online.
Sipas Komisionit të Mbikëqyrjes dhe Kontrollit të Lojërave të Fatit, gjatë vitit 2025 rreth 900 mijë qytetarë grekë morën pjesë në aktivitete të paligjshme të basteve, duke i shkaktuar shtetit një humbje prej rreth 400 milionë eurosh në të ardhura.
Për të frenuar këtë fenomen, Ministria greke e Financave ka hartuar një projektligj të ri, i cili zgjeron kontrollet edhe mbi aplikacionet celulare dhe parashikon masa të ashpra ndaj personave që reklamojnë ose promovojnë platforma të palicencuara të lojërave të fatit.
Projektligji parashikon gjithashtu ndalimin e bankave dhe institucioneve të kreditit për të kryer pagesa drejt operatorëve të palicencuar, me synim ndërprerjen e rrjedhës financiare të tregut ilegal.
Ndryshimet ligjore përfshijnë edhe dënime me burg për rastet kur përdoren persona të tretë ose identitete të përfaqësuara për të marrë pjesë në lojërat e fatit, në kuadër të përpjekjeve për të rritur transparencën dhe për të luftuar aktivitetin e paligjshëm në këtë sektor.
Autoritetet greke kanë bërë të qartë se kontrollet do të intensifikohen, ndërsa fokusi do të jetë jo vetëm te operatorët e paligjshëm, por edhe te personat publikë që ndikojnë në promovimin e tyre përmes rrjeteve sociale.
