Lënia e një maceje vetëm në shtëpi kërkon kujdes dhe planifikim, paralajmërojnë ekspertët e kujdesit për kafshët shtëpiake.
Sipas këshillave të publikuara nga specialistët e platformës “My Personal Pet”, një mace e rritur dhe e shëndetshme mund të qëndrojë zakonisht vetëm deri në 24 orë, nëse ka ujë të freskët, ushqim të mjaftueshëm dhe një ambient të sigurt.
Për periudha deri në 48 orë, nevojitet përgatitje më e kujdesshme, ndërsa mungesa për më shumë se 72 orë pa ndihmën e një personi tjetër mund të përbëjë rrezik për shëndetin dhe mirëqenien e kafshës.
Ekspertët theksojnë se kur pronarët largohen për disa ditë, prania e një familjari, miku ose cat-sitter është e domosdoshme jo vetëm për ushqimin dhe ujin, por edhe për të kontrolluar gjendjen shëndetësore dhe emocionale të maces.
Ata kujtojnë se çdo mace ka karakter dhe nevoja të ndryshme, ndaj periudha që mund të kalojë vetëm duhet vlerësuar rast pas rasti.
“Një mace e lumtur është një mace e dashur, edhe kur pronari është larg”, thuhet në mesazhin sensibilizues për pronarët e kafshëve shtëpiake.
