Pas tërheqjes së zëvendëspresidentit amerikan JD Vance, Zvicra konfirmon se negociatat e së premtes mes Uashingtonit dhe Teheranit nuk do të zhvillohen.
Bisedimet mes Shteteve të Bashkuara dhe Iranit, të planifikuara për të premten në resortin malor Burgenstock në Zvicër, janë anuluar. Lajmi u konfirmua nga Ministria e Jashtme zvicerane, e cila njoftoi se takimi nuk do të mbahet sipas planit.
Vendimi vjen pasi Shtëpia e Bardhë bëri të ditur se zëvendëspresidenti amerikan JD Vance është tërhequr nga udhëtimi drejt Zvicrës, ku pritej të takohej me negociatorët iranianë për të nisur zbatimin e marrëveshjes së arritur mes Uashingtonit dhe Teheranit për përfundimin e luftës dhe rihapjen e Ngushticës së Hormuzit.
Anulimi i takimit ngre pikëpyetje të reja mbi ecurinë e marrëveshjes dhe hapat e ardhshëm diplomatikë mes dy vendeve, ndërsa ende nuk janë bërë publike arsyet e plota të shtyrjes së negociatave.
Zhvillimi vjen në një moment delikat për rajonin, ku komuniteti ndërkombëtar po ndjek me vëmendje zbatimin e marrëveshjes së arritur pas tensioneve të fundit mes SHBA-së dhe Iranit.
