Protestues në lindje të Republikës Demokratike të Kongos i kanë vënë flakën një qendre mjekësore ku po trajtoheshin pacientë me Ebola, pasi familjarët e një viktime kërkuan të merrnin trupin e të afërmit të tyre nga spitali.
Sipas autoriteteve lokale, incidenti ndodhi në spitalin Rwampara në provincën Ituri, ku të afërmit e një të riu të vdekur nga Ebola tentuan ta merrnin trupin “me forcë”. Pas refuzimit nga autoritetet shëndetësore, protestuesit hodhën sende drejt tendave mjekësore, duke shkaktuar zjarr.
Dy tenda të përdorura për trajtimin e pacientëve u dogjën plotësisht, ndërsa gjashtë pacientë që ndodheshin aty u transferuan në ambiente të tjera të spitalit.
Autoritetet kongoleze dhe organizatat humanitare thanë se sulmi lidhet edhe me përhapjen e dezinformatave, pasi shumë banorë në zonat e thella besojnë se Ebola “nuk ekziston” ose është “shpikje”.
Shpërthimi aktual i virusit në Kongon lindore është shkaktuar nga varianti Bundibugyo, për të cilin nuk ekziston vaksinë apo trajtim specifik. Sipas autoriteteve, të paktën 160 persona dyshohet se kanë humbur jetën, ndërsa janë raportuar qindra raste të dyshuara.
Organizata Botërore e Shëndetësisë e ka shpallur situatën emergjencë ndërkombëtare të shëndetit publik, ndërsa raste janë konfirmuar edhe në Ugandë.
