Kreu i Partisë Demokratike, Sali Berisha, ka lëshuar akuza të forta nga foltorja e Kuvendit, duke e cilësuar parlamentin si një institucion që, sipas tij, nuk mbron më interesat e qytetarëve.
Berisha deklaroi se në Shqipëri po zhvillohet një aktivitet i gjerë kriminal me call-centera që, sipas tij, mashtrojnë pensionistë në vende europiane si Italia, Austria, Gjermania dhe Spanja. Ai pretendoi se kjo veprimtari është e mbrojtur nga strukturat shtetërore në nivele të ndryshme.
Në akuzat e tij, Berisha përmendi edhe Olsi Rama, duke e cilësuar si “bosin kryesor” të këtij aktiviteti, ndërsa foli për përfshirje të zyrtarëve të ndryshëm dhe lidhje me rrjete ndërkombëtare mashtrimi.
Ai përmendi gjithashtu emra të tjerë si Amant Josifi, duke e lidhur me skema të mëdha mashtrimi financiar dhe përdorimin e kriptomonedhave për aktivitete të paligjshme.
Berisha ngriti shqetësimin për mungesën e hetimeve dhe pengimin, sipas tij, të ngritjes së komisioneve hetimore parlamentare, duke akuzuar institucionet e drejtësisë dhe policisë për mosveprim.
